گوٹھ جیا خان کھوسہ کو تحصیل اور میونسپل کارپوریشن کا درجہ دیا جانا ناگزیر ہو چکا ہے،سابق صوبائی وزیر اظہار حسین کھوسہ

چھتر(این این آئی) سابق صوبائی وزیر میر اظہار حسین خان کھوسہ نے گوٹھ جیا خان کھوسہ میں خطاب کرتے ہوئے کہا کہ گوٹھ جیا خان کھوسہ ایک قدیم، گنجان آباد اور کاروباری لحاظ سے نہایت اہم علاقہ ہے۔ یہاں مختلف سرکاری ادارے برسوں سے خدمات انجام دے رہے ہیں، اس لیے اس علاقے کو تحصیل اور میونسپل کارپوریشن کا درجہ دیا جانا ناگزیر ہو چکا ہے انہوں نے کہا کہ اگر حکومت اس علاقے کی اہمیت کو تسلیم کرتے ہوئے اسے انتظامی طور پر بااختیار بنائے تو نہ صرف عوامی مسائل میں خاطر خواہ کمی آئے گی بلکہ ترقیاتی منصوبے بھی بہتر انداز میں مکمل کیے جا سکیں گے میر اظہار حسین خان کھوسہ نے مزید کہا کہ چتن پٹی ٹو میر حسن روڈ علاقے کی مرکزی شاہراہ کی حیثیت رکھتی ہے، جس کی توسیع سے عوام کو آمد و رفت میں درپیش مشکلات میں نمایاں کمی آئے گی۔ انہوں نے کہا کہ ماضی میں ہمارے بزرگ، الحاج میر نبی بخش خان کھوسہ اور بابا میر ظہور حسین خان کھوسہ نے عوامی خدمت کو ہمیشہ ترجیح دی اور علاقے کی ترقی کے لیے قابلِ ذکر کردار ادا کیا ان کا کہنا تھا کہ “یہ علاقہ ہمیشہ ہمارے بزرگوں کی توجہ کا مرکز رہا ہے، اور میں ان کے نقشِ قدم پر چلتے ہوئے علاقے کی خوشحالی اور ترقی کے لیے ہر فورم پر آواز بلند کرتا رہوں گا انہوں نے حکومتِ بلوچستان سے مطالبہ کیا کہ گوٹھ جیا خان کھوسہ کو تحصیل اور میونسپل کارپوریشن کا درجہ دیا جائے تاکہ مقامی سطح پر عوامی مسائل کا حل ممکن ہو سکے اور نصیرآباد ڈویڑن میں ترقی کا نیا باب رقم کیا جا سکے۔