گندم کی پیداوار گزشتہ سال کے ہدف کے مقابلے 39 لاکھ میٹرک ٹن کم رکھنے کی تجویز

اسلام آباد(این این آئی)گندم کی پیداواری ہدف گزشتہ سال کے ہدف کے مقابلے 39 لاکھ میٹرک ٹن کم رکھنے کی تجویز دے دی گئی۔وفاقی وزیر غذائی تحفظ رانا تنویر حسین کی زیر صدارت وفاقی کمیٹی برائے زراعت کے اجلاس میں خریف فصلوں کی کارکردگی کا جائزہ لیا گیا۔اجلاس میں ربیع فصلوں کے لیے پیداواری اہداف تجویزکیے گئے، گندم کی پیداوار کا ہدف 2 کروڑ 96 لاکھ 80 ہزار میٹرک ٹن تجویز کیا گیا ہے۔گزشتہ سال گندم کا پیداواری ہدف 3 کروڑ 35 لاکھ 80 ہزار ٹن مقرر کیا گیا تھا لیکن حالیہ سال گندم کاپیداواری ہدف حاصل نہیں ہوسکا تھا جبکہ ختم ہونے والے سال میں گندم کی پیداوار ہدف سے 15.36 فیصد کم رہنے کا تخمینہ لگایا گیا۔اجلاس میں شرکا ء کو بتایا گیا کہ اس سال گنے کی پیداوار کا تخمینہ 84.7 ملین ٹن ہے، گنے کی پیداوارمیں 5.9 فیصد اضافے کا امکان ہے، چاول کی پیداوار کا تخمینہ 9.417 ملین ٹن ہے، چاول کی پیداوار میں 2.7 فیصد اضافے کا امکان ہے، مونگ بین کی پیداوار کا تخمینہ 150.8 ہزار ٹن ہے۔اجلاس میں بریفنگ کے دوران بتایا گیا کہ ریبع کی فصل کے لیے پانی کی دستیابی اطمینان بخش ہے، ربیع میں پنجاب و سندھ کے لیے 33.814 ملین ایکڑ فٹ پانی کی دستیابی مختص ہے۔محکمہ موسمیات کے مطابق نومبر، دسمبر میں بارشیں معمول سے کم متوقع ہیں، جنوری میں معمول کے قریب بارشوں کا امکان ہے جبکہ شدید سردی سے متعلق سوشل میڈیا افواہیں بے بنیاد قرار دے دی گئیں۔وفاقی وزیر رانا تنویر حسین نے کہا کہ کسانوں کو منصفانہ قیمت، معیاری بیج،قرضوں کی سہولت حکومت کی ترجیح ہے، غذائی تحفظ حکومت کی اولین ترجیح ہے۔