بائیو میٹرک تصدیق کے بغیر موبائل والیٹس، ڈیجیٹل بینک اکاؤنٹس کو کل سے بلاک کر دیا جائے گا

کراچی(این این آئی) بینک صارفین کے لئے بڑی خبر آگئی، بائیو میٹرک تصدیق کے بغیر موبائل والیٹس، ڈیجیٹل بینک اکاؤنٹس کو کل (پیر)سے بلاک کر دیا جائے گا۔تفصیلات کے مطابق اسٹیٹ بینک آف پاکستان کے نئے بایومیٹرک تصدیقی ضوابط نافذ ہونے جا رہے ہیں، جس کے بعد لاکھوں پاکستانی شہریوں کے ڈیجیٹل بینک اکانٹس اور والٹس بند ہونے کا خدشہ پیدا ہوگیا ہے۔ذرائع نے بتایا کہ اسٹیٹ بینک نے جولائی 2025 میں BPRD سرکلر نمبر 1 کے ذریعے تمام بینکوں، مائیکرو فنانس بینکوں، ڈیجیٹل بینکوں، ڈویلپمنٹ فنانس اداروں اور الیکٹرانک منی انسٹی ٹیوشنز کے لیے بایومیٹرک تصدیق کو لازمی قرار دیا ہے۔نئے ضوابط کے تحت اکانٹ ہولڈرز کو بایومیٹرک ویری فکیشن مکمل نہ کرنے کی صورت میں 25 اکتوبر سے اکانٹس سے لین دین کی سہولت معطل ہوسکتی ہے، جس میں رقوم بھیجنے یا وصول کرنے پر بھی پابندی شامل ہوگی۔ماہرین نے کہا کہ ان اقدامات سے لاکھوں اکانٹس، بشمول غیر ملکی کرنسی اور روشن ڈیجیٹل اکاؤنٹس متاثر ہوسکتے ہیں۔اسٹیٹ بینک کی جانب سے کہا گیاہے کہ کنسولیڈیٹڈ کسٹمر آن بورڈنگ فریم ورک اب انفرادی اور کارپوریٹ دونوں صارفین پر لاگو ہوگا، چاہے اکانٹ برانچ کے ذریعے کھولا گیا ہو یا آن لائن۔نئے قواعد کا مقصد منی لانڈرنگ اور دہشت گردی کی مالی معاونت کے خلاف اقدامات کو مضبوط بنانا اور مالیاتی نظام میں شفافیت پیدا کرنا ہے۔واضح رہے کہ اسٹیٹ بینک نے تمام مالیاتی اداروں کو تین ماہ کی مہلت دی تھی تاکہ وہ نئے بایومیٹرک تقاضوں پر عمل درآمد یقینی بنا سکیں، تاہم ڈیڈ لائن میں کسی قسم کی توسیع کا اعلان نہیں کیا گیا۔