ڈیرہ بگٹی ڈگری کالج کی واحد بس خراب، طلبہ و طالبات مشکلات سے دوچار

ڈیرہ بگٹی (این این آئی)ڈیرہ بگٹی ڈگری کالج کی واحد بس جو صبح میل اور شام فیمیل طلبہ و طالبات کو گھروں تک پہنچانے کے لیے استعمال ہوتی تھی، گزشتہ دو ماہ سے خراب ہے۔ذرائع کے مطابق بس کی خرابی کے باعث درجنوں طلبہ و طالبات کو روزانہ آنے جانے میں شدید دشواری کا سامنا ہے۔ والدین اور شہریوں نے ڈائریکٹر کالجز بلوچستان اور وزیراعلیٰ بلوچستان سے اپیل کی ہے کہ ڈگری کالج ڈیرہ بگٹی کی پرانی بس کی فوری مرمت کے ساتھ ساتھ ایک نئی منی ویگن بھی فراہم کی جائے۔علاقہ مکینوں کا کہنا ہے کہ چونکہ ڈیرہ بگٹی شہر کی گلیاں تنگ اور چھوٹی ہیں، اس لیے فیمیل اسٹوڈنٹس کے لیے منی ویگن زیادہ موزوں سواری ثابت ہوگی، جو بچیوں کو گھروں سے اٹھا کر کالج تک باحفاظت پہنچا سکے۔عوامی حلقوں نے کہا کہ “ڈیرہ بگٹی جیسے پسماندہ علاقے میں تعلیم حاصل کرنا پہلے ہی مشکل ہے، کالج کی بس کی خرابی اور نئی سواری کی عدم فراہمی نے طلبہ و طالبات کی مشکلات میں مزید اضافہ کر دیا ہے۔