عوام کا اعتماد ٹوٹنے نہیں دینگے،حلقہ پی بی 44 میں متعدد ترقیاتی منصوبوں پر کام جاری ہے اور بعض مکمل ہوچکے ہیں، رکن بلوچستان اسمبلی میر عبید گورگیج

کوئٹہ(این این آئی) رکن بلوچستان اسمبلی حلقہ پی بی 44 اور پیپلز پارٹی بلوچستان کے سینئر رہنما میر عبید گورگیج نے کہا ہے کہ بلوچستان کے عوام نے ہمیشہ جمہوریت، تعمیر و ترقی اور روشن سیاسی سوچ کا ساتھ دیا ہے۔ عوامی اعتماد پر پورا اترنے کے لیے ضروری ہے کہ منتخب نمائندے زمینی حقائق کو سامنے رکھتے ہوئے عملی اور دیرپا اقدامات کریں۔ صحافیوں کے گروپ سے بات چیت کرتے ہوئے۔ انہوں نے کہا کہ پی بی 44 سمیت پورے بلوچستان میں بنیادی سہولیات کی فراہمی، تعلیم و صحت کے نظام کی بہتری، روزگار کے مواقع پیدا کرنے اور زراعت و معدنیات کے شعبوں کی ترقی کے لیے مربوط حکمتِ عملی ناگزیر ہے۔ عوام نے ہمیں اپنے مسائل کے حل کے لیے منتخب کیا ہے اور ہم اُن کے اعتماد کو کبھی ٹوٹنے نہیں دیں گے۔ میر عبید گورگیج نے کہا کہ پیپلز پارٹی ہمیشہ سے بلوچستان کے حقوق کی ترجمان رہی ہے اور آئندہ بھی صوبے کی ترقی و خوشحالی کے لیے ہر ممکن کردار ادا کرتی رہے گی۔ انہوں نے کہا کہ صوبے کے وسائل کو شفافیت کے ساتھ استعمال کیا جائے تو نہ صرف پسماندگی دور ہو سکتی ہے بلکہ بلوچستان پورے ملک کی معاشی ترقی میں کلیدی کردار ادا کرسکتا ہے۔ انہوں نے کہا کہ میں اپنی حلقہ پی بی 44 کے عوام کو یقین دلاتا ہوں کہ ترقیاتی منصوبوں کو ترجیحی بنیادوں پر مکمل کیا جائے گا، اور نوجوانوں کے لیے ہنر اور روزگار کے نئے مواقع پیدا کیے جائیں گے۔ عوامی خدمت ہی میرا مشن ہے اور اسے پورا کرنا میری ذمہ داری بھی ہے۔ انہوں نے کہا کہ بلوچستان کے سیاسی و سماجی استحکام کے لیے تمام اسٹیک ہولڈرز کو مل کر آگے بڑھنا ہوگا تاکہ صوبے کا روشن مستقبل یقینی بنایا جا سکے۔