خضدار پریس کلب کیلئے ایک کروڑ روپے کا ترقیاتی منصوبہ منظور

خضدار(این این آئی)خضدار پریس کلب کی تعمیر نو اور توسیع کے لیئے ایک کروڑ روپے کے ترقیاتی منصوبے کی منظوری دے دیدی گئی۔ اس رقم سے خضدار پریس کلب کی تعمیر و مرمت ہوگی اور لائبریری کو اپ گریڈ کیاجائیگا، جس پر کام آئندہ چند روز تک شروع ہوگا۔ہفتے کے روز پراجیکٹ ڈائریکٹر بی ایس ڈی آئی انجینئر فیاض جمعہ نے ایکسیئن محکمہ مواصلات و تعمیرات سلیم رزاق عمرانی کے ہمراہ خضدار پریس کلب کا دورہ کیا۔ اس موقع پر پریس کلب کے صدر عبداللہ شاہوانی، چیئرمین محمد ایوب بلوچ یونس بلوچ عبدالجبار حسنیب سمیت دیگر عہدیدار و ممبران نے مہمانوں کا خیرمقدم کیا اور انہیں پریس کلب کا تفصیلی وزٹ کروایا۔انجینئر صاحبان نے کانفرنس ہال، نیوز روم، لائبریری، باؤنڈری وال، مین گیٹ اور دیگر شعبوں کا جائزہ لیا اور تجاویز دیئے۔خضدار پریس کلب کے عہدیداروں نے کہا کہ خضدار پریس کلب کے کچھ مسائل تھے جو اس فنڈ سے حل ہونگے۔ ایک کروڑ روپے کے فنڈز کی منظوری سے صحافی برادری کے دیرینہ مطالبے کی تکمیل ہوئی ہے۔ ہم تمام متعلقہ حکام اور صوبائی حکومت کے شکر گزار ہیں۔ یہ منصوبہ نہ صرف خضدار پریس کلب کی خوبصورتی بڑھائے گا بلکہ صحافیوں کو جدید سہولیات بھی فراہم کرے گا۔ ہم امید کرتے ہیں کہ کام بلا تاخیر شروع ہو گا۔پراجیکٹ ڈائریکٹر انجینئر فیاض جمعہ نے صحافیوں سے گفتگو کرتے ہوئے یقین دلایا کہ معیار و میرٹ میں کوئی کمی نہیں ہوگی اور ادارے کی بہترین تعمیر ومرمت کی جائے گی۔ اس موقع پر ممبران و عہدیداران عبدالواحد رند عامر باجوئی عبدالرزاق زہری وسیم بلوچ و دیگر بھی موجود تھے۔