کوئٹہ میں موجود اشرافیہ کوعوامی مسائل سے دلچسپی نہیں،سہولیات کی عدم فراہمی کے باجود بھاری اوور بلنگ نے زندگی اجیرن کردی ہے، مولانا عبدالرحمن

کوئٹہ(این این آئی)جمعیت علماء اسلام ضلع کوئٹہ کے امیرمولانا عبدالرحمن رفیق، جنرل سیکرٹری حاجی عین اللہ شمس،سرپرستِ اعلیٰ مفتی محمد روزی خان، شیخ مولانا عبد الاحد، مولانا عبد البصیر، حافظ رشید احمد، حافظ مسعود احمد، مفتی روزی خان بادیزئی،حافظ سراج الدین،مفتی نیک محمد فاروقی، مولوی نقیب اللہ ملاخیل اور دیگر نے اپنے مشترکہ بیان میں کہا ہے کہ کوئٹہ میں موجود اشرافیہ کومسائل سے کوئی دلچسپی نہیں ہے،سہولیات کی عدم فراہمی کے باجود بھاری بھرکم اوور بلنگ نے زندگی اجیرن کردی ہے، عوام بنیادی سہولیات سے محروم سڑکیں خستہ حالی کا شکار، صفائی کا نظام درہم برہم، اور پینے کے صاف پانی جیسی ضرورت بھی نایاب ہوتی جارہی ہے۔ حکمرانوں کی عدم توجہی نے شہر کو کھنڈر بنانے میں کوئی کسر نہیں چھوڑی انہوں نے کہاکہ ایسے نازک حالات میں جمعیت علماء اسلام ہی وہ واحد سیاسی قوت ہے جو کوئٹہ کے عوام کیلئے امید کی کرن ہے ہماری سیاست کا محور ذاتی مفادات نہیں بلکہ عوام کی خدمت شفاف قیادت اور امانتدار نمائندگی ہے۔ ہم نے ہمیشہ مشکل وقت میں عوام کا ساتھ نبھایا ہے اور آئندہ بھی اسی عزم کے ساتھ میدانِ سیاست میں اپنا کردار ادا کرتے رہیں گے انہوں نے کہا کہ بلدیاتی انتخابات میں جمعیت علماء اسلام دیانتدار، باصلاحیت اور عوامی درد رکھنے والے امیدواروں کو سامنے لائے گی انہوں نے عوام سے اپیل کی کہ وہ جھوٹے دعوؤں اور کھوکھلے نعروں کے فریب میں آنے کے بجائے سچی نمائندگی کا انتخاب کریں وقت آچکا ہے کہ کوئٹہ کے لوگ اپنی محرومیوں کا حساب لیں اور جمعیت علماء اسلام کے امیدواروں کو کامیاب بنا کر بھرپور کردار ادا کریں۔