کوئٹہ(این این آئی) جمعیت علماء اسلام (س) کے مرکزی ڈپٹی سیکرٹری جنرل مولانامحمد شفیق دولت زئی نے کہا ہے کہ پنجاب میں قومی اور صوبائی اسمبلی کی نشستوں پر ضمنی انتخابات میں مسلم لیگ (ن) اور پیپلزپارٹی کے امیدواروں او ر خاص کر ہری پور کی قومی اسمبلی کی نشست پر مسلم لیگ (ن) کی بھاری اکثریت سے کامیابی سے ثابت ہوا ہے کہ پاکستان میں مسلم لیگ(ن) اکثریتی جماعت بن چکی ہے ایک بیان میں مولانا محمدشفیق دولت زئی نے کہا کہ اپوزیشن جماعت تحریک انصاف اور حکمران جماعتوں کو چاہئے کہ وہ ملک دشمن عناصر کو شکست دینے اور ملکی استحکام کیلئے اپنے ذاتی اختلافات کو بالائے طاق رکھ کر کام کرنا چاہئے۔ انہوں نے کہا کہ پاکستان میں سیاسی جماعتوں کی جانب سے ایک دوسرے کی اکثریت کو تسلیم نہ کرنے کی وجہ سے کئی بار مارشل لاء لگ چکا ہے اب ملک مارشل لاء کا متحمل نہیں ہوسکتا اپوزیشن اور حکومتی جماعتوں کو چاہئے کہ ملک کے استحکام اور اندرونی و بیرونی دشمنوں کو شکست دینے کیلئے اتحاد و اتفاق کا مظاہرہ کریں تاکہ ملک ترقی و خوشحالی کی راہ پر گامزن ہوسکے۔
اپوزیشن،حکومتی جماعتوں کو چاہئے ملکی استحکام،اندرونی و بیرونی دشمنوں کو شکست دینے کیلئے اتحاد و اتفاق کا مظاہرہ کریں،مولانا شفیق دولت زئی
