غیر معیاری،ناقص کام اور فرائض میں غفلت برتنے پر اسسٹنٹ انجینئر فوری طور پرمعطل

کوئٹہ(این این آئی)ایڈمنسٹریٹر میٹروپولیٹن کارپوریشن کوئٹہ مجیب الرحمن قمبرانی نے غیر معیاری،ناقص کام اور فرائض میں غفلت برتنے پر اسسٹنٹ انجینئرکو فوری طور پرمعطل کردیا۔جمعرات کوایڈمنسٹریٹر میٹروپولیٹن کارپوریشن کوئٹہ مجیب الرحمن قمبرانی نے کوئٹہ کے ترقیاتی منصوبوں کادورہ کیااس دوران انہوں نے غیرمعیاری اور ناقص کام اور فرائض میں غفلت برتنے پرمتعلقہ اسسٹنٹ انجینئر کو فوری طور پر معطل کردیا انہوں نے واضح کیا کہ ترقیاتی منصوبوں میں معیار اوربروقت تکمیل ہر افسر کی اولین ذمہ داری ہے اور کسی بھی قسم کی غفلت یا ناقص کارکردگی برداشت نہیں کی جائے گی۔انہوں نے کہاکہ معطل اسسٹنٹ انجینئرکے خلاف تفصیلی انکوائری کی جائے گی اورتحقیقات مکمل ہونے کے بعد سفارشات پیش کی جائیں گی۔انہوں نے کہا کہ ترقیاتی اسکموں کے عملدرآمد میں شفافیت اور معیار پر زیرو ٹالرنس پالیسی اختیار کی گئی ہے اور کسی بھی خلاف ورزی و غفلت پر سخت کارروائی عمل میں لائی جائے گی۔انہوں نے کہا کہ میٹروپولیٹن کارپوریشن کوئٹہ شہری خدمات کی فراہمی اور شہری ترقی کی استعداد بڑھانے کے لئے بھر پور اقدامات کر رہی ہے اور حکومت و میٹروپولیٹن انتظامیہ عوامی مفاد کے ہر منصوبے کو ترجیحی بنیادوں پر مکمل کرنے کیلئے پرعزم ہے۔