صوبے سے دہشتگردی کے خاتمے کیلئے پولیس فرنٹ لائن پر فرائض سرانجام دے رہی ہیں،سیدجہانگیرشاہ

کوئٹہ(این این آئی)مسلم لیگ(ن) کے صوبائی رہنما سید جہانگیرشاہ نے کہا ہے کہ صوبے سے دہشت گردی کے خاتمے کیلئے پولیس فرنٹ لائن پر فرائض سرانجام دے رہی ہیں ڈی آئی جی پولیس اور ڈی آئی جی سی ٹی ڈی کی کوششوں کی بدولت صوبے میں امن وامان کی صورتحال میں کافی حد تک بہتری آئی ہے اورکوئٹہ میں چوری،ڈکیتی کی وارداتوں میں نمایاں کمی ہوئی ہے۔یہاں جاری ہونے والے ایک بیان میں سیدجہانگیرشاہ نے کہا کہ بلوچستان ایک حساس صوبہ ہے جہاں دہشت گردی کے واقعات میں ابتک سینکڑوں افراد نے جام شہادت نوش کیا دہشت گردی کے خلاف جاری جنگ میں بلوچستان پولیس فرنٹ لائن پر کام کررہی ہے۔انہوں نے کہا کہ صوبے اور خاص کرکوئٹہ میں چوری اورڈکیتی کے واقعات میں اضافے کے بعد ڈی آئی جی کوئٹہ پولیس عمران شوکت اورڈی آئی جی سی ٹی ڈی نے سخت نوٹس لیتے ہوئے امن و امان میں خلل ڈالنے والوں کے خلاف سخت کارروائی کا حکم دیا جس کے بعد پولیس نے جرائم پیشہ عناصر کے خلاف بھر پور کارروائیاں کی جس سے کوئٹہ میں امن و امان کی صورتحال میں کافی حد تک بہتری آئی ہے اور عوام میں تحفظ کا احساس پایا جاتا ہے۔ انہوں نے کہا کہ ڈی آئی جی پولیس اور ڈی آئی جی سی ٹی ڈی گورنر بلوچستان شیخ جعفرخان مندوخیل اور وزیراعلیٰ بلوچستان میرسرفراز بگٹی کی مشاورت سے صوبے میں امن و امان کیلئے اقدامات کریں کیونکہ دونوں شخصیات صوبے کے عوام کودہشت گردی اور جرائم سے نجات دلانا چاہتے ہیں۔انہوں نے آئی جی پولیس سے اپیل کی کہ ڈی آئی جی پولیس اور ڈی آئی جی سی ٹی ڈی کی کارکردگی کو مدنظررکھتے ہوئے انہیں ترقی دی جائے۔