پنجگور میں جاری ترقیاتی کاموں کو تمام محکمے معیار اور وقت کے مطابق مکمل کریں،رکن اسمبلی رحمت صالح بلوچ

پنجگور(این این آئی) ڈپٹی کمشنر پنجگور کے دفتر میں ایک اہم اجلاس منعقد ہوا جس کی صدارت ڈپٹی کمشنر پنجگور عبدالکبیر ذرکون نے کی۔ اجلاس میں ایم پی اے پنجگور رحمت صالح بلوچ، ایس ایس پی پنجگوردوست محمد بگٹی، اسسٹنٹ کمشنر پنجگور افتخار ظہیر، اسسٹنٹ کمشنر گوارگو آغا ظفر، ایڈیشنل ڈپٹی کمشنر پنجگور عطاء اسد سمیت مختلف لائن ڈپارٹمنٹس کے سربراہان نے شرکت کی اجلاس کا بنیادی مقصد ضلع پنجگور کے مختلف محکموں کی کارکردگی، کارگزاری، جاری ترقیاتی منصوبوں اور مجموعی انتظامی امور کا تفصیلی جائزہ لینا تھا۔ اس موقع پر تعلیم، صحت، زراعت، تعمیرات، اور دیگر لائن ڈپارٹمنٹس نے اپنی اپنی کارکردگی سے متعلق تفصیلی پریزنٹیشنز پیش کیں ایم پی اے رحمت صالح بلوچ نے ضلع میں جاری مسائل، چیلنجز اور ترقیاتی منصوبوں پر گفتگو کرتے ہوئے متعلقہ محکموں کے افسران سے کہا کہ ضلع پنجگور ہماری مشترکہ ذمہ داری ہے، اور ہر محکمہ پوری ایمانداری، دیانت اور فرض شناسی کے ساتھ اپنی خدمات انجام دے۔ڈپٹی کمشنر عبدالکبیر ذرکون نے واضح ہدایات دیتے ہوئے کہا کہ ضلع میں تعلیم کے شعبے پر کسی قسم کا سمجھوتہ نہیں کیا جائے گا اور اس حوالے سے زیرو ٹالرنس اپنایا جائے گا۔ انہوں نے تمام محکموں کو ہدایت کی کہ وہ اپنی کارکردگی کو مزید بہتر بنائیں، جاری منصوبوں جیسے سڑکوں کی تعمیر، بلڈنگز، اور دیگر ترقیاتی اسکیموں کو معیار اور وقت کے مطابق مکمل کریں اس موقع پرایس ایس پی پنجگور دوست محمد بگٹی نے امن و امان کی صورتحال پر بریفنگ دی۔ ایم پی اے رحمت صالح بلوچ نے امن و امان کی بہتری پر پولیس کی کارکردگی کو سراہا اور کہا کہ دوست محمد بگٹی کی تعیناتی کے بعد ضلع میں امن و استحکام میں نمایاں بہتری آئی ہے اجلاس کا اختتام اس عزم کے ساتھ ہوا کہ تمام محکمے ضلع پنجگور کی بہتری، ترقی اور عوامی فلاح کے لیے مشترکہ حکمتِ عملی کے تحت اپنا بھرپور کردار ادا کریں گے۔