فیلڈ مارشل ملکی معیشت کی بحالی میں کردار ادا کریں عمران رشید شیخ

کراچی(اسٹاف رپورٹر)کنٹری پریزیڈنٹ ہومن رائٹس برائے اقوامِ متحدہ اور معروف تاجر رہنما عمران رشید شیخ نے میڈیا نمائندگان سے گفتگو کرتے ہوئے کہا کہ موجودہ معاشی حالات ملکی معیشت کے لیے نہایت تشویش ناک صورتِ حال اختیار کر چکے ہیں۔ بھاری بھرکم ٹیکسوں کی بروقت ادائیگی کے باوجود بزنس کمیونٹی شدید بے یقینی کا شکار ہے۔ان کا مزیدکہنا تھا کہ پاکستان کا جی ڈی پی سست روی کا شکار ہے جبکہ مہنگائی اور ٹیکسوں کی شرح میں روز بروز اضافہ ہو رہا ہے۔ پاکستان کو سب سے زیادہ زرمبادلہ فراہم کرنے والی ٹیکسٹائل انڈسٹری تباہی کے دہانے پر پہنچ چکی ہے۔ بھاری ٹیکسوں، مہنگی بجلی اور گیس کی قلت کے باعث لگ بھگ 100 کے قریب ٹیکسٹائل ملیں بند ہو چکی ہیں اور متعدد ملٹی نیشنل کمپنیاں پاکستان میں اپنا کاروبار بند کرکے جاچکی ہیں جوکہ ملک میں بیروزگاری کے ساتھ ملکی معیشت پر منفی اثرات مرتب کرچکی ہے،عمران رشید شیخ نے چیف آف آرمی اسٹاف فیلڈ مارشل سید عاصم منیر سے اپیل کی کہ وہ ملکی و بیرونی دشمن عناصر کے خاتمے کے ساتھ ساتھ پاکستان کو معاشی استحکام فراہم کرنے میں اپنا موثر کردار ادا کریں۔ انہوں نے کہا کہ ملکی معیشت پاکستان کی ریڑھ کی ہڈی کی مانند ہے، لہٰذا ضروری ہے کہ قومی اور عالمی سطح پر معیشت کے حوالے سے جامع لائحہ عمل مرتب کیا جائے۔