نوشکی(رپورٹر) مسائلستان کا گڑھ بن چکا ہے آئے روز ڈکیتیاں گیس بجلی کی طویل لوڈ شیڈنگ بے روزگاری نوجوانوں میں مایوسی افراتفری کا ماحول ہے نیشنل پارٹی
نیشنل پارٹی کے ڈسٹرکٹ و تحصیل کابینہ کا اجلاس زیر صدارت ڈسٹرکٹ صدر فاروق بلوچ منعقد ہوا اجلاس کے مہمان خاص سابق صدر آغا رب نواز شاہ تھے اجلاس میں نیشنل پارٹی کے ڈسٹرکٹ اور تحصیل کے عہدیداران نے شرکت کی اجلاس سے اظہار خیال کرتے ہوئے ڈسٹرکٹ صدر فاروق بلوچ جنرل سیکرٹری ایم رمضان حسنی نائب صدر مجیب بلوچ تحصیل صدر بہاول خان میڈیا سیکرٹری سنگت قادر بلوچ ترجمان رازق زہری سابق صدر آغا رب نواز شاہ یوتھ سیکرٹری سلمان بلوچ میر لیاقت بادینی علی اکبر بلوچ محمد اکبر خان بادینی نے کہا نوشکی اس وقت بدترین انتظامی، معاشی اور سماجی بحرانوں کا شکار ہے۔ آئے روز چوری، ڈکیتی اور دیگر جرائم میں اضافہ اس بات کا واضح ثبوت ہے کہ ضلعی انتظامیہ اور منتخب نمائندے امن و امان کی ذمہ داریاں نبھانے میں ناکام ہو چکے ہیں۔ عوام اپنے گھروں، دکانوں اور بازاروں میں عدم تحفظ کا شکار ہیں اور صورتحال مسلسل بگڑتی جا رہی ہے۔
بجلی اور گیس کی طویل ترین لوڈشیڈنگ نے عوام کی روزمرہ زندگی اجیرن بنا دی ہے۔ کاروبار بند ہو رہے ہیں، طلبہ کا تعلیمی سلسلہ متاثر ہو رہا ہے، اور گھریلو خواتین شدید مشکلات سے دوچار ہیں۔ اس کے ساتھ ساتھ نوجوانوں میں بے روزگاری تیزی سے بڑھ رہی ہے، جو مایوسی اور اضطراب کو جنم دے رہی ہے۔
رخشان ڈویژن کا قیام عملاً برائے نام ثابت ہوا ہے۔ عوام کو آج تک کوئی انتظامی ریلیف نہیں ملا، نہ ہی ترقیاتی منصوبوں میں پیش رفت ہوئی۔ اس کے علاوہ ریکوڈک منصوبے میں نوشکی کے نوجوانوں کو بھرتیوں سے باہر رکھنا سراسر ناانصافی ہے۔ مقامی وسائل پر سب سے پہلا حق مقامی لوگوں کا ہے لیکن یہاں نوجوانوں کو نظر انداز کر کے مایوسی کی ایک نئی لہر پیدا کی گئی ہے۔
نوشکی سے منتخب نمائندگان کی کارکردگی انتہائی مایوس کن ہے۔ وہ عوام کے مسائل پر خاموش تماشائی بنے بیٹھے ہیں، نہ اسمبلی میں آواز اٹھائی جاتی ہے اور نہ ہی عوامی مسائل کے حل کے لیے کوئی سنجیدہ اقدام دکھائی دیتا ہے۔ نوشکی کے عوام خود کو بے سہارا اور بے آواز سمجھنے پر مجبور ہیں۔
نیشنل پارٹی واضح کرتی ہے کہ موجودہ صورتحال اب مزید برداشت نہیں کی جا سکتی۔
ہم جلد آل پارٹیز کانفرنس بلانے جا رہے ہیں جس میں تمام سیاسی جماعتوں، قبائلی عمائدین، سول سوسائٹی اور طلبہ تنظیموں کو اعتماد میں لیا جائے گا۔ اس کانفرنس کا مقصد نوشکی کے مسائل کو یکجا کر کے مشترکہ لائحۂ عمل ترتیب دینا ہے تاکہ:
امن و امان کی بحالی
بجلی و گیس بحران کا حل
نوجوانوں کی روزگار تک رسائی
ریکوڈک سمیت تمام ترقیاتی منصوبوں میں مقامی افراد کا حق
رخشان ڈویژن کو فعال اور با اختیار بنانا
منتخب نمائندوں کی کارکردگی پر عوامی نگرانی
کو عملی شکل دی جا سکے۔
نیشنل پارٹی نوشکی کے عوام کو یقین دلاتی ہے کہ وہ ان کے حقوق، وسائل اور شناخت کے تحفظ کے لیے ہر سطح پر آواز اٹھاتی رہے گی۔ نوشکی کے نوجوانوں کی محرومی اور سرکاری اداروں کی بے حسی اب مزید برداشت نہیں کی جائے گی۔
