اسلام آباد (رپورٹر) گورنمنٹ بوائز ماڈل اسکول قلعہ سیف اللہ، بلوچستان کے طلبہ اور فیکلٹی ممبران پر مشتمل وفد نے جمعہ کے روز پارلیمنٹ ہاؤس اسلام آباد کا مطالعاتی دورہ کیا۔ وفد پارلیمانی نظام، قانون سازی کے عمل اور ریاستی اداروں کے کام سے متعلق اپنی تعلیمی سمجھ کو بہتر بنانے کے لیے اس مطالعاتی دورے پر اسلام آباد پہنچا تھا۔ پارلیمنٹ ہاؤس آمد پر وفد کا سینیٹ سیکرٹریٹ کے حکام نے پرتپاک استقبال کیا۔
اپنے دورے کے دوران طلبہ نے سینیٹ میوزیم اور گلیِ دستور کا بھی معائنہ کیا، جہاں انہیں پارلیمنٹ کے کام کے طریقہ کار، قانون سازی کے مختلف مراحل، سینیٹ کی آئینی ذمہ داریوں اور پارلیمانی جمہوریت کے بنیادی اصولوں پر مفصل بریفنگ دی گئی۔
سینیٹ میوزیم میں طلبہ کو پاکستان کی پارلیمانی تاریخ، آئینِ پاکستان کی تشکیل کے مراحل اور قانون سازی کے اہم نکات سے بھی آگاہ کیا گیا۔
اس موقع پر سینیٹر جان محمد بلیدی اور سینیٹر دوست علی جیسر نے وفد سے ملاقات کی، طلبہ کی حوصلہ افزائی کی اور انہیں پارلیمانی نظام سے متعلق رہنمائی فراہم کی۔ بعد ازاں طلبہ اور فیکلٹی ممبران نے دونوں معزز سینیٹرز کے ساتھ گروپ فوٹو بھی بنوایا…
