چمن میں بے روزگاری اور کاروبار کی بندش کے باعث عوام خود کشیاں کرنے پر مجبورہوچکے ہیں، صادق خان اچکزئی

کوئٹہ(این این آئی)مظلوم عوامی تحریک پاکستان کے مرکزی چیئرمین صادق خان اچکزئی نے کہا ہے کہ چمن میں بے روزگاری اور کاروبار کی بندش کی وجہ سے حالات اس مقام پرآپہنچے ہیں کہ لوگ ایک طرف خودکشیاں کررہے ہیں تو دوسری طرف چمن ڈاکوؤں کے رحم و کرم پرہے جہاں کوئی شخص اب محفوظ نہیں ہے۔ ان خیالات کا اظہار انہوں نے گزشتہ شب ایس کے ہاوس میں پارٹی رہنماؤں اور قبائلی مشران سے بات چیت کرتے ہوئے کیا۔ صادق ادوزئی نے کہا کہ چمن میں حالات بے روزگاری اور تنگدستی کی وجہ سے دن بدن خراب ہوتے جارہے ہیں صوبائی حکومت کو چمن کے حالات کی پرواہ بھی نہیں ہے پورے چمن میں ڈاکو راج قائم ہے بے روزگاری اور حالات سے تنگ عوام خودکشیاں کررہی ہے چمن کے یہ حالات اور کاروبار کی بندش ہم سب کے لئے ناقابل برداشت ہوتی جارہی ہے حکومت بتائے کہ عوام کہاں جائیں ان سے تو دو وقت کی روٹی اور کاروبار چھینا گیا ہے بلوچستان اسمبلی چمن کے حالات اور امن وامان کی تباہی پر حکومت سمیت خاموش تماشائی بنی ہوئی ہے۔ صادق ادوزئی نے کہا کہ مظلوم عوامی تحریک پاکستان کو سڑکوں پر نکلنے پر مجبور نہ کیا جائے حکومت اس سنگین صورتحال پر سنجیدگی دکھائے اور اگر بے بس ہے تو حکومت چھوڑ دے کیونکہ جو حکومت روزگار اور کاروبار نہیں دے سکتی ہے اور امن و امان کو قائم نہیں رکھ سکتی ہے اسے حکومت کرنے کا کوئی حق حاصل نہیں ہے۔ صادق خان نے کہا کہ چمن میں لوگوں کا جینا حرام ہوچکاہے اور لوگ ان حالات سے نفسیاتی اور اعصابی مریض بن گئے ہیں ہم وفاق اور صوبے سے مطالبہ کرنا چاہتے ہیں کہ چمن کے حالات پر رحم کرے اور لوگوں کو روزگار اور کاروبار کے مواقع دیں اور بند کیا گیا کاروبار واپس بحال کریں۔