تفتان بارڈرکے راستے 1979افراد پاکستان میں داخل ہوچکے،37سفارتکار بھی شامل ہیں،وزیراعلیٰ میرسرفراز بگٹی

کوئٹہ(این این آئی) وزیر اعلیٰ بلوچستان میر سرفراز بگٹی نے کہا ہے کہ ایران سے ابتک تفتان بارڈرکے راستے 1979افراد پاکستان میں داخل ہوچکے ہیں جن میں 37سفارتکار بھی شامل ہیں۔ یہ بات انہوں نے جمعرات کو سماجی رابطے کی سائٹ ایکس پر اظہار خیال کرتے ہوئے کہی۔ وزیراعلیٰ بلوچستان نے کہا کہ ایران میں جاری کشیدہ صورتحال کے پیش نظر حکومت بلوچستان کی تمام متعلقہ مشینری مکمل طور پر الرٹ ہے، ایران سرحد کے راستے پاکستانی شہریوں سمیت غیر ملکیوں کی آمد کا سلسلہ جاری ہے۔ وزیر اعلیٰ بلوچستان میر سرفراز بگٹی نے کہا کہ تفتان بارڈر پر آنے والے تمام افراد کو ہر ممکن سہولیات اور ضروری معاونت فراہم کی جا رہی ہے۔انہوں نے کہاکہ اب تک تفتان بارڈر کے ذریعے مجموعی طور پر 1979 افراد پاکستان میں داخل ہو چکے ہیں جن میں 37 سفارتکار بھی شامل ہیں۔