نواب ثناء اللہ زہری،میر شفیق الرحمن مینگل نے نصف صدی قبل بزرگوں کی تاریخی رفاقت و روایات کی تجدید کی ہے،میر محمد نصیر خان مینگل

کوئٹہ +کراچی (این این آئی) سابق وزیر اعلیٰ بلوچستان میر محمد نصیر خان مینگل نے اپنے بیان میں کہا ہے کہ مرحوم سردار دودا خان زہری اور مرحوم حاجی میر نیک محمد مینگل کی رفاقت جھالاوان کی قبائلی، سماجی اور سیاسی تاریخ کا ایک سنہرا باب رہا ہے جو باہمی اعتماد، روایات کی پاسداری، عزت و احترام اور مشترکہ قبائلی اقدار پر مبنی ایک مضبوط اور پائیدار تعلق تھاجس نے اپنے دور میں علاقے میں استحکام، ہم آہنگی اور بھائی چارے کو فروغ دیا۔انہوں نے کہا کہ ماضی کی یہی مضبوط بنیادیں آج بھی جھالاوان کے امن اور ترقی کے لیے مشعلِ راہ ہیں، اور یہ بات انتہائی حوصلہ افزا ہے کہ اسی تاریخی اور قابلِ فخر رفاقت کو چیف آف جھالاوان نواب ثناء اللہ خان زہری اور میر شفیق الرحمن مینگل نے نئے جذبے، سیاسی بصیرت اور قبائلی شعور کے ساتھ دوبارہ زندہ کر دیا ہے۔ ان کا کہنا تھا کہ میر شفیق الرحمن مینگل کی خصوصی دعوت پر چیف آف جھالاوان نواب ثناء اللہ خان زہری کا وڈھ باڈڑی آمد محض ایک رسمی دورہ نہیں بلکہ ماضی کے دیرینہ تعلقات کی باضابطہ تجدید اور ایک نئے باب کے آغاز کا واضح اعلان تھا۔میر محمد نصیر خان مینگل نے مزید کہا کہ یہ روایتی دورہ اس بات کی غماز ہے کہ دونوں رہنما اپنے بزرگوں کے نقشِ قدم پر چلتے ہوئے نہ صرف روایتی رشتوں کو بحال کر رہے ہیں بلکہ انہیں موجودہ حالات کے مطابق مزید مضبوط اور مؤثر بھی بنا رہے ہیں۔ نواب ثناء اللہ خان زہری اور میر شفیق الرحمن مینگل کی یہ مشترکہ کاوش جھالاوان کے قبائلی و سیاسی ڈھانچے میں نہ صرف مثبت ہم آہنگی اور باہمی اعتماد کی فضا بحال ہوگی بلکہ خطے میں امن، استحکام اور ترقی کے نئے امکانات بھی روشن ہوں گے۔ یہ پیش رفت جھالاوان کے سیاسی منظرنامے میں ایک اہم سنگِ میل ثابت ہوگی، جہاں قبائلی اتحاد کو نئی جہت ملے گی اور مشترکہ مفادات کے تحفظ کو یقینی بنایا جا سکے گا،میر محمد نصیر خان مینگل نے اس امید کا اظہار کیا کہ نواب ثناء اللہ خان زہری اور میر شفیق الرحمن مینگل کی قیادت میں یہ نیا اتحاد مستقبل میں جھالاوان کے عوام کے لیے خوشحالی، ترقی اور یکجہتی کا پیغام ثابت ہوگا، اور آنے والی نسلوں کے لیے ایک مضبوط، باوقار اور روشن روایت کے طور پر ہمیشہ یاد رکھا جائے گا۔