کوئٹہ(این این آئی)کوئٹہ الیکٹرک سپلائی کمپنی (کیسکو) کے ترجمان نے کہاہے کہ گزشتہ روز کوئٹہ، مستونگ اور سبی کے علاقوں میں چوروں نے 11kV کے کھمبوں سے کنڈکٹرز چوری کر لیئے۔ ترجمان نے کہا کہ کوئٹہ کے علاقہ دشت میں چوروں نے 11kV حمزہ فیڈر کے 59کھمبوں جبکہ عاصم آباد فیڈر کے 148کھمبوں کے کنڈکٹرز کاٹ کر چوری کر لیئے۔مستونگ کے علاقہ درینگڑھ کے حدود میں چوروں نے 11kv کے 19 کھمبوں کے کنڈکٹرز کاٹ کر چوری کر لیئے۔ اسی طرح سبی میں تلی روڈ پر 11kV ہائیڈرولوجی فیڈر کے 26کھمبوں کے کنڈکٹرز کاٹ کر چوری کر لیئے گئے۔ترجمان نے کہا کہ کیسکو نے مذکورہ واقعات میں ملوث ملزمان کے خلاف ایف آئی آر اور قانونی کارروائی کیلئے متعلقہ پولیس اسٹیشنز میں تحریری درخواستیں جمع کرادی ہیں۔ تاکہ انکے خلاف قانونی کاروائی عمل میں لائی جا سکے۔ترجمان نے کہا کہ صوبہ کے مختلف علاقوں میں برقی تنصیبات پر چوری کے واقعات میں اضافہ ہوتا جا رہا ہے اس سلسلے میں کیسکو نے تمام صارفین سے اپیل کی ہے کہ وہ قومی اثاثوں کی حفاظت کو یقینی بنانے کے لیئے ٹرانسمیشن لائنز کے کنڈکٹرز اور دیگر برقی آلات چوری کرنے والوں کی نشاندہی میں کیسکو سے تعاون کریں تاکہ انکے خلاف قانونی کاروائی عمل میں لائی جا سکے۔
کوئٹہ، مستونگ اور سبی میں 11kV کے مختلف فیڈروں کے کنڈکٹرز چوری
