شہداء پولیس ہمارے ماتھے کا جھومر ہیں، جنہوں نے امن و امان کی بحالی اور عوام کی حفاظت کے لیے اپنی جانوں کا نذرانہ پیش کیا،ایس ایس پی لسبیلہ عاطف امیر

اوتھل(این این آئی)یومِ شہدائے پولیس کے موقع پر ایس ایس پی لسبیلہ عاطف امیر کی خصوصی ہدایت پر ایس ایس پی آفس لسبیلہ میں شہداء پولیس کو خراج عقیدت پیش کرنے کے لیے ایک پروقار تقریب کا انعقاد کیا گیا۔ اس موقع پر پولیس افسران اور جوانوں نے اپنے فرائض کی ادائیگی کے دوران جامِ شہادت نوش کرنے والے عظیم سپاہیوں کو بھرپور خراجِ عقیدت پیش کیا۔ڈی ایس پی اوتھل سرکل حاصل خان قمبرانی،سپرٹینڈں ٹ ایس ایس پی آفس حق نواز نے شہداء کی یادگار پر پھول چڑھائے اور ان کے درجات کی بلندی کے لیے فاتحہ خوانی کی۔ اس موقع پر ایس ایس پی آفس کا عملہ، پولیس افسران، جوان،خواتین لیڈی کانسٹیبلز اور دیگر شرکاء موجود تھے جنہوں نے شہداء کی قربانیوں کو یاد کرتے ہوئے ان کی خدمات کو سراہا۔ڈی ایس پی حاصل خان قمبرانی نے اپنے مختصر خطاب میں کہا کہ شہداء پولیس ہمارے ماتھے کا جھومر ہیں، جنہوں نے امن و امان کی بحالی اور عوام کی حفاظت کے لیے اپنی جانوں کا نذرانہ پیش کیا۔ اْن کی قربانیاں کبھی رائیگاں نہیں جائیں گی، اور ہم ان کے مشن کو جاری رکھنے کا عزم رکھتے ہیں۔تقریب کے اختتام پر دعا کی گئی کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور ان کے اہلِ خانہ کو صبر جمیل دے۔