ضلع چاغی میں ٹیکوانڈو کے ضلعی انتخابات جلد از جلد کرائے جائیں گے،علی احمد ریکی

دالبندین(این این آئی) چاغی ٹیکوانڈو ایسوسی ایشن کا ایک اہم اجلاس زیر صدارت صدر علی احمد ریکی منعقد ہوا، جس کا آغاز تلاوتِ کلامِ پاک سے کیا گیا۔ اجلاس میں ضلع بھر کے رجسٹرڈ کلبوں کے صدور، جنرل سیکریٹریز، سینئر کھلاڑیوں اور دیگر عہدیداروں نے بھرپور شرکت کی۔اجلاس میں مختلف اہم ایجنڈوں پر تفصیلی غور و خوض کیا گیا۔ اس موقع پر بلوچستان ہائی کورٹ کے فیصلے اور اسپورٹس پالیسی 2008 کی روشنی میں فیصلہ کیا گیا کہ ضلع چاغی میں ٹیکوانڈو کے ضلعی انتخابات جلد از جلد کرائے جائیں گے۔ اجلاس میں یہ بھی طے پایا کہ بلوچستان ٹیکوانڈو ایسوسی ایشن کے آئندہ انتخابات صوبے کے دیگر اضلاع سے مشاورت کے بعد مشترکہ طور پر اور اسپورٹس پالیسی کے تحت منعقد کیے جائیں گے۔اجلاس کے دوران صدر چاغی ٹیکوانڈو ایسوسی ایشن علی احمد ریکی اور جنرل سیکریٹری میر فیروز شاہ نوتیزئی نے اپنی چار سالہ کارکردگی کی تفصیلی رپورٹ پیش کی۔ اس موقع پر تیکوانڈو اکیڈمی کے سرپرست اعلیٰ حاجی عبدالستار کشانی، ظہور احمد ریکی، میر ابراہیم ریکی، اور دیگر سینئر کھلاڑیوں فیض اللہ عابد، بصیر احمد، صفی اللہ ریکی، ملا عبد الحق نوتیزئی نے کابینہ کی کارکردگی کو سراہتے ہوئے کہا کہ گزشتہ چار برسوں میں چاغی کے ٹیکوانڈو کھلاڑیوں نے نیشنل اور انٹرنیشنل سطح پر شاندار کامیابیاں حاصل کیں اور نہ صرف ضلع چاغی بلکہ پورے بلوچستان اور پاکستان کا نام دنیا بھر میں روشن کیا۔شرکاء نے اس عزم کا اظہار کیا کہ آئندہ بھی ٹیکوانڈو کے فروغ، کھلاڑیوں کی تربیت اور کھیل کے دائرہ کار کو مزید وسعت دینے کے لیے موثر اور منظم لائحہ عمل تیار کیا جائے گا۔