اختر مینگل پر حملہ وفاق اور ریاستی اداروں کی ناکامی ہے، حافظ منیر حسین احمد

کوئٹہ (این این آئی) جمعیت علماء اسلام کے رہنما حافظ منیر حسین احمد نے کہا ہے کہ سردار اختر مینگل پر بم حملہ بلوچستان میں بڑھتی ہوئی بدامنی اور ریاستی اداروں کی ناکامی کا منہ بولتا ثبوت ہے۔ انہوں نے کہا کہ سیاسی رہنماؤں کو نشانہ بنانا نہ صرف جمہوریت پر حملہ ہے بلکہ ملک کی سالمیت کے لیے بھی خطرے کی گھنٹی ہے۔اپنے ایک بیان میں انہوں نے کہا کہ سردار اختر مینگل جیسے محب وطن اور اصولی سیاستدان کو نشانہ بنانا دراصل بلوچستان کی آواز کو دبانے کی کوشش ہے۔ یہ انتہائی افسوسناک اور قابلِ مذمت واقعہ ہے۔ حکومت اور قانون نافذ کرنے والے ادارے ذمہ داری سے کام لیں اور حملہ آوروں کو فوری طور پر گرفتار کریں۔جے یو آئی رہنما نے مزید کہا کہ بار بار ایسے واقعات ہونا اس بات کا ثبوت ہے کہ بلوچستان کے مسائل کو طاقت کے ذریعے دبانے کی پالیسی ناکام ہوچکی ہے۔ انہوں نے کہا کہ حکومت کو بلوچستان کے عوام کو ان کے حقوق دینا ہوں گے اور سیاسی عمل کے ذریعے ہی دیرپا امن قائم کیا جا سکتا ہے۔انہوں نے سردار اختر مینگل اور ان کے ساتھیوں سے اظہارِ یکجہتی کرتے ہوئے زخمی کارکنان کی جلد صحتیابی کی دعا کی اور مطالبہ کیا کہ آئندہ ایسے واقعات کی روک تھام کے لیے فول پروف سیکیورٹی انتظامات کیے جائیں۔