وفاقی محتسب کے حکم پر درخواست گزار صاحب خان کے بجلی بل پر عائد جرمانے ختم کروا دیئے

کوئٹہ(این این آئی)وفاقی محتسب کے حکم پر درخواست گزار صاحب خان کے بجلی بل پر عائد جرمانے ختم کروا دیے گئے۔درخواست گزار صاحب خان نے بتایا کہ متعلقہ محکمہ (Qesco) نے انکا میٹر تبدیل کیا اور انہیں غلط میٹر ریڈنگ پر 194,088 روپے کا غیر منصفانہ بل ارسال کیا۔انہوں نے بتایا کہ وہ بل کی درستگی کے لیے متعدد بار متعلقہ دفتر گئے لیکن کوئی شنوائی نہ ہوئی۔لہذا، انہوں نے بروقت کاروائی اور انصاف کے حصول کے لیے وفاقی محتسب کوئٹہ سے رجوع کیا اور متعلقہ محکمے کے خلاف درخواست دائر کی درخواست موصول ہوتے ہی وفاقی محتسب کوئٹہ نے بروقت انکوائری کا آغاز کیا اور متعلقہ محکمے کو طلب کر کے کیس کی فوری سماعت شروع کر دی۔سماعت کے دوران متعلقہ محکمہ کوئی تسلی بخش جواب نہ دے سکا۔لہذا، وفاقی محتسب نے احکامات جاری کیے کہ درخواست گزار کے بل کی درستگی جلد کی جائے۔احکامات موصول ہوتے ہی متعلقہ محکمے نے بل کی درستگی کر دی جس سے عائد جرمانے ختم ہو گئے۔