نوجوان قیادت پر فخر،تبدیلی ممکن ہے، صادق خان اچکزئی

کوئٹہ (این این آئی)مظلوم عوامی تحریک پاکستان کے تنظیمی فیصلے کے مطابق نوجوان سیاسی رہنما عباس خان درانی کو پارٹی کا مرکزی صدر مقرر کر دیا گیا ہے۔ پارٹی کے مرکزی عہدیداروں اور کارکنان نے ان کی تقرری کو خوش آئند قرار دیتے ہوئے انہیں مبارکباد پیش کی ہے۔مرکزی رہنما صادق خان اچکزئی نے اس موقع پر کہا کہ ہمیں اپنی نوجوان قیادت پر فخر ہے، کیونکہ ملک و قوم میں حقیقی تبدیلی صرف نوجوانوں کے جذبے اور قیادت سے ممکن ہے۔ انہوں نے کہا کہ مظلوم عوامی تحریک پاکستان عوامی مسائل کے حل اور مظلوم طبقات کے حقوق کے تحفظ کے لیے اپنی جدوجہد جاری رکھے گی۔نومنتخب مرکزی صدر عباس خان درانی نے اپنی نامزدگی پر اظہارِ خیال کرتے ہوئے کہا کہ عوامی خدمات کو عبادت سمجھ کر ہی پہچ تکمیل تک پہنچایا جا سکتا ہے۔ انہوں نے کہا کہ وہ پارٹی کے منشور اور قائدین کے وڑن کے مطابق عوامی خدمت، سیاسی بیداری اور مظلوم طبقات کی آواز بلند کرنے کے لیے بھرپور کردار ادا کریں گے۔پارٹی کے مختلف صوبوں سے تعلق رکھنے والے رہنماؤں اور کارکنوں نے بھی عباس خان درانی کو مرکزی صدر مقرر کیے جانے کے فیصلے کو تنظیم کے لیے نیک شگون قرار دیا ہے۔