دالبندین پرائس کنٹرول کمیٹی کا اجلاس، اشیائے خوردونوش کے نئے نرخ مقرر

دالبندین(این این ائی)اسسٹنٹ کمشنر دالبندین مجیب الرحمٰن ساتکزئی کی زیر صدارت پرائس کنٹرول کمیٹی کا اہم اجلاس منعقد ہوا، جس میں تحصیلدار علی احمد ساسولی، انجمن تاجران کے صدر حاجی نور احمد چاغیوال، حاجی محمد غوث، نائب صدرعبدالرزاق چنال، حاجی نعمت اللہ نوتیزئی اور وائس چیئرمین جمیل خان نے شرکت کی۔اجلاس میں عوامی نمائندگی جمعیت علماء اسلام کے ضلعی امیر مولانا صالح محمد حقانی اور جنرل سیکرٹری سردار نجیب خان سنجرانی نے کی۔ اجلاس کے دوران دالبندین بازار میں اشیائے ضروریہ کی قیمتوں میں استحکام اور ناجائز منافع خوری کے خاتمے سے متعلق تفصیلی غور و خوض کیا گیا۔اس موقع پر اسسٹنٹ کمشنر مجیب الرحمٰن ساتکزئی نے کہا کہ عوام کو ریلیف فراہم کرنا انتظامیہ کی اولین ترجیح ہے۔ کسی بھی تاجر کو زائد قیمتیں وصول کرنے یا ذخیرہ اندوزی کی اجازت نہیں دی جائے گی۔ انہوں نے ہدایت کی کہ تمام دکاندار مقرر کردہ نرخ نامے کو نمایاں جگہ پر آویزاں کریں اور عوام کو سہولت فراہم کریں۔اجلاس کیاختتام پر مختلف اشیائیخوردونوش، سبزی، پھل، گوشت اور دیگر ضروری سامان کے نئے نرخ مقرر کیے گئے اور سرکاری نرخ نامہ جاری کیا گیا۔عوامی و سماجی حلقوں نے اجلاس کو سراہتے ہوئے کہا کہ اگر مقررہ نرخوں پر سختی سے عملدرآمد کرایا گیا تو مہنگائی میں کمی اور عوام کو واضح ریلیف ملے گا۔