میکسیکو آئندہ سال مارچ میں پرتگال اور بیلجیم کے خلاف دوستانہ میچز کھیلے گا

میکسیکو سٹی(این این آئی)میکسیکو کی قومی فٹبال ٹیم آئندہ سال ہونے والے فیفا ورلڈ کپ کی تیاری کے لیے مارچ 2026 میں دو دوستانہ میچز کھیلے گی، جن میں پرتگال اور بیلجیم اس کے حریف ہوں گے۔ میڈیارپورٹ کے مطابق یہ اعلان میکسیکو فٹبال فیڈریشن نے کیا،ال ٹری ٹیم 28 مارچ2026 کو تازہ کاری شدہ ایزٹیکا سٹیڈیم میں پرتگال کے خلاف نبردآزما ہوگی جبکہ تین دن بعد بیلجیم کے خلاف میچ کھیلے گی، جو شکاگو میں کھیلا جائے گا۔فیڈریشن کے بیان کے مطابق میکسیکو کی قومی ٹیم کی سپورٹنگ ڈائریکٹوریٹ نے تصدیق کی ہے کہ مارچ 2026 کے فیفا ونڈو میں پرتگال اور بیلجیم، دونوں ٹیمیں جو فیفا کے ٹاپ 10 میں شامل ہیں، ہمارے حریف ہوں گی۔یہ میچ میکسیکو کے لیے ایزٹیکا سٹیڈیم میں اپنے روایتی گھر میں پہلی بار ہوگا، جو گزشتہ سال اپریل میں فیفا کے معیار کے مطابق تجدیدی کام کے لیے بند کیا گیا تھا۔تجدید میں ڈریسنگ رومز کی اپ گریڈیشن، ہاسپیٹلیٹی ایریاز کی بہتری اور نئے سیٹ شامل ہیں۔ایزٹیکا سٹیڈیم، جس میں 1970 اور 1986 کے ورلڈ کپ فائنلز بھی کھیلے گئے تھے، 2026 کے ورلڈ کپ میں بھی افتتاحی میچ سمیت چار دیگر میچز کی میزبانی کرے گا۔