ضلع چاغی میں لوکل سرٹیفکیٹ کا نظام جدید سسٹم سے منسلک

دالبندین (این این آئی)ضلع چاغی میں لوکل سرٹیفکیٹ کے نظام کو نادرا سے منسلک کرکے ایک جدید اور مؤثر سسٹم متعارف کرا دیا گیا ہے۔ اس نظام سے نہ صرف عوام کے لیے سہولت میسر آئے گی بلکہ غیر مقامی افراد کی روک تھام میں بھی مدد ملے گی۔تفصیلات کے مطابق، ضلع چاغی میں لوکل سرٹیفکیٹس کا اجرا ہمیشہ سے ایک متنازعہ مسئلہ رہا ہے۔ علاقے کے طلبہ اور نوجوان اکثر شکایت کرتے تھے کہ غیر مقامی افراد باآسانی جعلی یا غیرقانونی طور پر لوکل سرٹیفکیٹ حاصل کر لیتے ہیں، جس کے باعث مقامی نوجوانوں کو ملازمتوں اور میڈیکل کی نشستوں پر محرومی کا سامنا کرنا پڑتا تھا۔ان مسائل کے پیش نظر، ضلعی انتظامیہ کی خصوصی دلچسپی اور ڈپٹی کمشنر عطاء المنیم بلوچ و ایڈیشنل ڈپٹی کمشنر نظام رحیم بلوچ کی قیادت میں ایک جدید سسٹم متعارف کروا کر انسٹال کر دیا گیا ہے۔ اس نئے نظام کے تحت جو بھی شخص لوکل سرٹیفکیٹ کے لیے درخواست دیتا ہے، اس کی نادرا اور الیکشن کمیشن سے آن لائن تصدیق کی جاتی ہے، تاکہ مکمل جانچ پڑتال کے بعد ہی سرٹیفکیٹ جاری کیا جائے اس سے پہلے، سائل کو خود مختلف دفاتر، خاص طور پر الیکشن کمیشن کے چکر لگانے پڑتے تھے، لیکن اب جدید نظام کے تحت یہ تمام مراحل خودکار طریقے سے مکمل ہوتے ہیں، جس سے عوام کو سہولت میسر آئی ہے۔عوامی ضروریات کو مدنظر رکھتے ہوئے، ڈسٹرکٹ چیئرمین عبدالودود خان سنجرانی نے لوکل سرٹیفکیٹ آفس کے لیے اے سی، واٹر کولر اور دیگر ضروری سامان بھی فراہم کر دیا ہے، تاکہ سائلین کو دفتر میں کسی قسم کی پریشانی کا سامنا نہ ہو۔اس کے علاوہ، چیئرمین عبدالودود خان سنجرانی نے اعلان کیا ہے کہ تحصیل نوکنڈی، تحصیل تفتان، تحصیل چاغی اور دالبندین سٹی میں بھی جلد لوکل سرٹیفکیٹ آفس قائم کیے جائیں گے، تاکہ ضلع بھر کے عوام کو ان کے دہلیز پر سہولیات میسر ہوں۔عوامی حلقوں نے ضلعی انتظامیہ اور ڈسٹرکٹ چیئرمین کے اس اقدام کو سراہتے ہوئے انھیں خراجِ تحسین پیش کیا ہے، کیونکہ لوکل سرٹیفکیٹس میں غیر مقامی افراد کی روک تھام علاقہ کے نوجوانوں کے لیے ایک اہم اور مثبت قدم ہے۔