ریکوڈک مائننگ کمپنی ضلع چاغی کے نوجوانوں کو ترجیح دے، نور احمد قمبرزئی

دالبندین(این این آئی) سیاسی و قبائلی رہنما نور احمد قمبرزئی نے مطالبہ کیا ہے کہ ریکوڈک مائننگ کمپنی ضلع چاغی کے بے روزگار نوجوانوں کو دیگر اضلاع کے مقابلے میں خصوصی ترجیح دے اور بھرتی کے بعد انہیں اپنے تربیتی مراکز میں ہنر مند بنایا جائے۔انہوں نے کہا کہ اس وقت ہنر فاؤنڈیشن، ریکوڈک مائننگ کمپنی کے تعاون سے نوکنڈی میں نوجوانوں کو ہنر سکھا رہی ہے جو ایک خوش آئند اقدام ہے، تاہم اس سہولت کو دالبندین اور ضلع چاغی کے دیگر علاقوں تک بھی توسیع دی جائے تاکہ زیادہ سے زیادہ بے روزگار اور خواہشمند نوجوان مستفید ہو سکیں۔نور احمد قمبرزئی نے بتایا کہ 2028ء میں زیر زمین مائننگ کی پیداوار شروع ہونے کے بعد ریکوڈک مائننگ کمپنی کو کھربوں ڈالر کی آمدنی ہوگی، جس میں سونا اور دیگر قیمتی معدنیات شامل ہوں گی۔ ان کے مطابق، اگر کمپنی اور حکومت چاہیں تو ضلع چاغی کے ہر خاندان کے سربراہ کو ایک لاکھ روپے بھی دیے جائیں تو کمپنی کے خزانے میں کمی نہیں آئے گی۔انہوں نے مزید کہا کہ ریکوڈک کی پیداوار سے حاصل ہونے والی رقم اتنی خطیر ہوگی کہ اگر اس کا ایک حصہ ضلع چاغی کی فلاح و بہبود پر خرچ کیا جائے تو کمپنی پر کوئی اثر نہیں پڑے گا۔