تفتان انتظامیہ کی غفلت کے باعث ایک عالم دین کی شہادت واقع ہوئی، جو تفتان کے لیے ایک بڑا سانحہ ہے،مولوی کلیم اللہ نورزئی کی

تفتان(این این آئی) جمعیت علماء اسلام کا مولوی کلیم اللہ نورزئی کی شہادت پر احتجاجی اجتماع,تفتان میں جمعیت علماء اسلام کے رہنما مولوی کلیم اللہ نورزئی کی شہادت پر جمعیت علما اسلام تفتان کی جانب سے احتجاجی ریلی نکالی گئی۔ ریلی ابو ہریرہ مدرسہ تفتان سے شروع ہو کر مختلف شاہراہوں سے گزرتی ہوئی مین چورنگی پر ایک بڑے اجتماع کی شکل اختیار کر گئی۔اجتماع سے خطاب کرتے ہوئے جمعیت علماء اسلام کے رہنماؤں، سابق ضلعی امیر مولانا حاجی نجیب اللہ محمد حسنی، مرکزی رہنما سردار عبد الرحیم خلجی، جمعیت علماء اسلام تفتان کے امیر مولانا عبد الشکور محمد حسنی اور قاری عبد الرحمن اہجباڑی نے کہا کہ ضلعی اور تفتان انتظامیہ کی غفلت کے باعث ایک عالم دین کی شہادت واقع ہوئی، جو تفتان کے لیے ایک بڑا سانحہ ہے۔مقررین کا کہنا تھا کہ اگر انتظامیہ چاہے تو ایک گھنٹے میں ملزمان کو گرفتار کرسکتی ہے، مگر دانستہ غفلت اور سستی کا مظاہرہ کیا جا رہا ہے۔ انہوں نے کہا کہ شہید عالم دین کا خون رائیگاں نہیں جائے گا، جمعیت علماء اسلام اس سانحے کی بھرپور مذمت کرتی ہے اور ضلعی انتظامیہ کو خبردار کرتی ہے کہ ایک ہفتے کے اندر قاتلوں کو گرفتار کر کے کیفر کردار تک پہنچایا جائے، بصورت دیگر جمعیت علماء اسلام اپنے علماء کے قاتلوں کو خود بھی گرفتار کر کے عوام کے سامنے لا سکتی ہے۔رہنماؤں نے کہا کہ اگر انتظامیہ قاتلوں کو پکڑنے میں ناکام رہی تو جمعیت علماء اسلام سخت سے سخت موقف اختیار کرے گی۔اجتماع کے اختتام پر مولانا مفتی طیب محمد حسنی نے شہید کے ایصال ثواب کے لیے اجتماعی دعا کرائی