لسبیلہ میں بااثر افراد کا سرکاری روڈ بند، انتظامیہ کی خاموشی پر شہری پریشان

لسبیلہ(بیوروچیف) ہندو محلہ میں چند بااثر افراد کی جانب سے سرکاری روڈ پر بریئر لگا کر راستہ بند کرنے کا معاملہ تاحال حل نہ ہو سکا۔ سوشل میڈیا اور پرنٹ میڈیا میں متعدد بار خبریں نشر ہونے کے باوجودضلعی انتظامیہ کی خاموشی پر شہری حلقوں میں سخت تشویش پائی جا رہی ہے۔علاقہ مکینوں کا کہنا ہے کہ ان بااثر افراد نے گلی بند کر کے عوام کو شدید مشکلات میں مبتلا کر دیا ہے، جبکہ انتظامیہ تماشائی بنی ہوئی ہے۔ مکینوں کے مطابق روڈ بند کرنے والے افراد کا کہنا ہے کہ ہمارا کوئی کچھ نہیں بگاڑ سکتا جو کہ قانون کی کھلی خلاف ورزی ہےاوتھل کے عوامی و سماجی حلقوں نے ڈپٹی کمشنر لسبیلہ محترمہ حمیرا بلوچ چیئرمین میونسپل کمیٹی اوتھل سید سومار شاہ کاظمی چیف آفیسر میونسپل کمیٹی اوتھل حاجی محمد خان دودا اور دیگر بالا حکام سے مطالبہ کیا ہے کہ فوری نوٹس لے کر سرکاری روڈ بحالکروایا جائے اور قانون توڑنے والوں کے خلاف کارروائی کی جائے تاکہ شہری سکون کا سانس لے سکیں۔