خضدار پریس کلب کی عبدالرزاق زہری اوربیٹے کیساتھ پیش آئے واقعے کی مذمت

خضدار(این این آئی) خضدار پریس کلب کی جانب سے جاری کردہ بیان میں گزشتہ شام ضلع خضدار کے علاقہ باغبانہ میں ڈکیت گروہ کی جانب سے خضدار پریس کلب کے فنانس سیکریٹری عبدالرزاق زہری اور ان کے بیٹے کے ساتھ پیش آنے والے المناک اغوا اور تشدد کے واقعے کی شدید الفاظ میں مذمت کی گئی ہے۔ صحافتی ادارے نے اس ظالمانہ عمل کو صحافتی برادری پر واضح حملہ قرار دیتے ہوئے ملزمان کی فوری گرفتاری اور سخت سزائیں دینے کا مطالبہ کیا ہے۔بیان میں کہا گیا ہے کہ “گزشتہ شام عبدالرزاق زہری اور ان کے بیٹے کو باغبانہ کورک سے مسلح افراد نے اغوا کر لیا تھا۔ ملزمان نے عبدالرزاق زہری اور ان کے فرزند ارسلان زہری کو پہاڑوں میں لے جا کر رسیوں سے باندھ دیا اور اس پر نہ رحم کرنے والا تشدد کیا۔ اس کے علاوہ ان کی گاڑی، موبائل فون اور نقدی رقم بھی لوٹ لی گئی، جبکہ دیگر قیمتی سامان بھی اپنے ساتھ لے گئے۔ بہت دیر بعد وہ وہاں سے بھاگ نکلنے میں کامیاب ہوئے، لیکن وہ زخمی حالت میں ہیں اور انہیں فوری طبی امداد دی جا رہی ہے۔”خضدار پریس کلب کے صدر و جنرل سیکریٹری اور دیگر عہدیداروں نے مشترکہ طور پر بیان جاری کرتے ہوئے کہاکہ یہ حملہ نہ صرف عبدالرزاق زہری اور ان کے خاندان پر ہے بلکہ یہ پورے صحافتی حلقے پر ہے۔ مقامی انتظامیہ، پولیس اور صوبائی حکومت سے مطالبہ کیا جاتا ہے کہ ملزمان کی فوری نشاندہی اور گرفتاری عمل میں لائی جائے۔”عبدالرزاق زہری نے بیان کے بعد میڈیا سے بات چیت کرتے ہوئے کہا: “میرا بیٹا زندہ تو بچ گیا، لیکن ہم پر تشدد کیا گیا، ہمیں اغوا کیا اور رسیوں سے باندھا، گاڑی، موبائل اور نقدی سمیت دیگر قیمتی سامان اپنے ساتھ لے گئے۔ ہمیں ویرانی میں پھینکا گیا، ہم نے بڑی مشکل سے رسیوں کے گرہیں کھول کر بھاگ نکلنے میں کامیاب ہو گئے۔”