بڑے لیڈروں نے شراکت اقتدار کے ہر فارمولے کو قبول کرکے بدترین آمریت کی راہ ہموار کی،سینیٹر میرطاہر بزنجو

کوئٹہ(این این آئی)نیشنل پارٹی کے مرکزی رہنماء سابق سینیٹر و دانشور میر طاہر بزنجو نے کہا کہ بڑے لیڈروں نے شراکت اقتدار کے ہر فارمولے کو قبول کرکے بدترین آمریت کی راہ ہموار کردی،انہوں نے کہا کہ ترامیم کا سلسلہ رکے گا نہیں،26 ویں ترمیم کے بعد 27 ویں ترمیم اور اب 28ویں ترمیم بھی لانے کی خبریں آرہی ہیں،27ویں ترمیم کے ضمن میں مسلم لیگ اور پیپلز پارٹی کے لیڈر ز خریدی گئی پارلیمان کو بتا رہے تھے کہ یہ 27 ویں ترمیم وہی ہے جو میثاق جمہوریت میں طے کیاگیا تھا،انہوں نے کہا کہ غلط بیانی کی بھی حد ہوتی ہے اگر 27ویں ترمیم وہی ہے جو میثاق جمہوریت میں طے کیاگیا تھا تو اس کو منظور کرنے کیلئے اتنی جلد بازی کا مظاہرہ کیوں کیا گیا انہوں نے کہا کہ بلاول بھٹو زرداری نے جوش خطابت میں کہا کہ کسی کے باپ کی جرات نہیں کہ وہ 18 ویں ترمیم کو ختم کریں، کسی دوسرے کے باپ کے بارے میں ہم کچھ نہیں کہہ سکتے لیکن سچی بات تو یہ ہے کہ آپ کے والد محترم نے میاں برادران کے ساتھ مل کر اپنی لائی گئی 18ویں ترمیم کا سر قلم کر دیا انہوں نے کہا کہ اللہ تعالیٰ اس ملک کے جمہوری سوچ رکھنے والے باضمیر سیاسی کارکنوں،صحافیوں اور دانشوروں پر رحم کرے۔