کوئٹہ پرونشل سلیکشن بورڈ ون کا اجلاس پھر ملتوی، سرکاری افسران میں شدید بے چینی

کوئٹہ(این این آئی) بلوچستان میں سرکاری افسران کی ترقیوں سے متعلق اہم فورم پرونشل سلیکشن بورڈ ون کا اجلاس ایک مرتبہ پھر ملتوی کردیا گیا، جس کے باعث مختلف محکموں کے سینکڑوں سرکاری افسران میں شدید مایوسی اور بیچینی پھیل گئی ہے۔ذرائع کے مطابق مذکورہ اجلاس طویل عرصے کے تعطل کے بعد چیف سیکریٹری بلوچستان شکیل قادر خان کی سربراہی میں 12 نومبر 2025 کو منعقد ہونا تھا، جس میں صوبے کے متعدد محکموں کے افسران کی اگلے گریڈ میں ترقیوں کے کیسز پر غور کیا جانا تھا۔ تاہم اجلاس کو ایک بار پھر غیر معینہ مدت کے لیے ملتوی کردیا گیا ہے اور حکام کی جانب سے صرف یہ بتایا گیا ہے کہ نئی تاریخ کا اعلان بعد میں کیا جائے گا۔سرکاری افسران کا کہنا ہے کہ ترقی سرکاری ملازمت میں ان کا بنیادی حق ہے، مگر بلوچستان میں یہ معاملہ مسلسل تاخیر کا شکار ہے جس سے انتظامی ڈھانچے میں بے اعتمادی اور غیر یقینی کی کیفیت بڑھ رہی ہے۔ ان کا کہنا ہے کہ حکومتی اقدامات، چاہے دانستہ ہوں یا نادانستہ، صوبے کے اہل افسران کو مشکلات سے دوچار کر رہے ہیں۔افسران نے صوبائی حکام، خصوصاً اربابِ اختیار سے مطالبہ کیا ہے کہ پرونشل سلیکشن بورڈ ون کے اجلاس کا فوری انعقاد یقینی بنایا جائے تاکہ ترقیوں کے منتظر افسران میں پائی جانے والی بیچینی کا خاتمہ ہو سکے اور سرکاری نظام اپنی مؤثر کارکردگی جاری رکھ سکے۔