ریکودک مائننگ کمپنی کا آئی بی اے سکھر کی اشتراک سے ریکوڈک سکالرشپ پروگرام کا آغاز

چاغی(این این آئی)ریکودک مائننگ کمپنی (RDMC) نے انسٹیٹیوٹ آف بزنس ایڈمنسٹریشن (IBA) سکھر کے اشتراک سے ریکودک اسکالرشپ پروگرام کا باضابطہ آغاز کر دیا ہے۔ اس اقدام کے تحت ضلع چاغی کیایسے 50 اسٹوڈنٹس جنہوں نے 2024–2025 میں انٹرمیڈیٹ مکمل کیا، کو مکمل طور پر فنڈڈ اسکالرشپس فراہم کی جائیں گی۔اس سلسلے میں اسٹوڈنٹس اور والدین میں آگاہی پیدا کرنے کے لیے آر ڈی ایم سی اور آئی بی اے سکھر نے ضلع بھر میں ایک جامع آگاہی مہم شروع کی جس کے تحت ہمئے گاؤں، نوکنڈی، دالبندین، تفتان اور چاغی ٹاؤن میں سیمینار منعقد کیے گئے۔ ان سیشنز کے دوران شرکاء کو اہلیت کے معیار، درخواست کے طریقہ کار اور اسکالرشپ سے حاصل ہونے والے تعلیمی مواقع کے بارے میں بریفنگ دی گئی۔ آئی بی اے سکھر امیدواروں کے لیے معیاری اہلیت ٹیسٹ لے گا جس کے بعد منتخب امیدواروں کو آئی بی اے سکھر میں چھ ماہ کے فاؤنڈیشن کورس میں داخل کیا جائے گا۔ یہ تیاری پروگرام اسٹوڈنٹس کو ان کی منتخب کردہ تعلیمی راہ کے مطابق آئی بی اے سکھر یا پاکستان کی کسی بھی معتبر یونیورسٹی یا کالج میں داخلے کے لیے تیار کرنے کے لیے ڈیزائن کیا گیا ہے۔ اس مکمل فنڈڈ اقدام کے تحت آر ڈی ایم سی،آئی بی اے سکھر کے ذریعے منتخب اسٹوڈنٹس کے چار سالہ تعلیمی اخراجات برداشت کرے گی تاکہ وہ مالی رکاوٹوں کے بغیر معیاری اور اعلیٰ تعلیم حاصل کر سکیں۔ریکودک اسکالرشپ پروگرام آر ڈی ایم سی کی انسانی صلاحیتوں میں سرمایہ کاری اور ضلع چاغی کے نوجوانوں کو مستقبل سنوارنے کا موقع فراہم کرنے کے عزم کی عکاسی کرتا ہے۔ آر ڈی ایم سی کی دیگر کمیونٹی سرمایہ کاریوں کی طرح، ریکودک اسکالرشپ پروگرام بھی کمیونٹی ڈیولپمنٹ کمیٹیوں (CDCs) کی سفارش پر تشکیل دیا گیا ہے، جو آر ڈی ایم سی کے مشترکہ اور مشاورتی سماجی سرمایہ کاری کے طریقہ کار کو ظاہر کرتا ہے۔ آر ڈی ایم سی تعلیم، صحت اور طویل المدتی استعداد سازی کے پروگراموں کی معاونت کے ذریعے خطے میں پائیدار کمیونٹی ترقی میں نمایاں کردار ادا کرتا رہے گا۔