نیشنل پارٹی آواران ضلعی کابینہ کی تقریبِ حلف برداری

آواران (رپورٹر) نیشنل پارٹی آواران کی نومنتخب ضلعی کابینہ کی تقریبِ حلف برداری ڈسٹرکٹ کونسل اجلاس کے اختتام پر منعقد ہوئی جہاں الیکشن کمیٹی کے چیئرمین واحد رحیم نے بلا مقابلہ منتخب ہونے والے عہدیداران سے حلف لیا۔ نومنتخب کابینہ نے اپنے عہد و پیمان کو دہراتے ہوئے کہا کہ وہ پارٹی آئین، منشور اور پالیسیوں کی پاسداری کرتے ہوئے نظم و ضبط، سیاسی جدوجہد اور عوامی خدمت کو اپنی اولین ترجیح بنائیں گے۔
اس موقع پر چیئرمین واحد رحیم اور ثاقب بزنجو نے کابینہ کے عہدیداران کو پارٹی مفلر اور پارٹی کیپ پہنائے ۔
تقریب سے ڈپٹی سیکرٹری جنرل واحد رحیم، ضلعی صدر عابد حسین، ثاقب بزنجو، جنرل سیکرٹری محمد کریم عمرانی، میڈم صباح بلوچ، شفیق مہر اور دیگر رہنماؤں نے خطاب کیا جبکہ اسٹیج سیکرٹری کے فرائض اشرف آھیر نے انجام دیے۔ مقررین نے اپنے خطابات میں کہا کہ نیشنل پارٹی کا بنیادی مشن عوام کو معیاری تعلیم، مؤثر صحت کی سہولیات، باعزت روزگار اور پرامن جمہوری بلوچستان کی جانب لے جانا ہے۔ انہوں نے کہا کہ نیشنل پارٹی نے ہمیشہ عوام کو دھوکہ دینے والی قوتوں، روایتی مفاداتی سیاست اور عوام دشمن عناصر کے سامنے سیسہ پلائی دیوار کا کردار ادا کیا ہے اور آئندہ بھی ساحل وسائل، عوامی حقوق اور وسیع تر قومی مفادات کے تحفظ کے لیے اپنی جدوجہد جاری رکھے گی۔
رہنماؤں نے کہا کہ نیشنل پارٹی خیرات اور محتاجی کی سیاست کو مسترد کرتی ہے۔ پارٹی کا پیغام خودداری، خود انحصاری اور باوقار زندگی کی تعمیر ہے۔ یہ جماعت ان سوچوں کا خاتمہ چاہتی ہے جو عوام کو کمزور اور سماجی شعور سے محروم رکھتی ہیں۔ نیشنل پارٹی عوام کو بااختیار بنانے، ان کے شعور کو بلند کرنے اور اجتماعی قوت کو متحرک کرنے کی سیاست پر یقین رکھتی ہے۔ مقررین نے مزید کہا کہ نیشنل پارٹی ایک ایسی سیاسی قوت ہے جو ہر طبقۂ فکر خاص طور پر خواتین اور نوجوانوں کو فیصلہ سازی اور پالیسی سازی میں شریک کرتی ہے، جس کے نتیجے میں آواران کی سیاست، سماج اور ترقی میں نمایاں مثبت تبدیلیاں جنم لے رہی ہیں۔
خطابات میں اس حقیقت پر زور دیا گیا کہ آواران کے عوام اور کارکنوں نے بلدیاتی انتخابات سے عام انتخابات تک جس یکجہتی، نظم اور محنت کے ساتھ کامیابیاں حاصل کیں وہ عوامی شعور، تنظیمی مضبوطی اور سیاسی استقامت کی روشن مثال ہے۔ مقررین نے کہا کہ جب عوام اور قیادت ایک ہی سمت میں کھڑے ہوں تو مشکلات رکاوٹ نہیں بنتیں بلکہ کامیابی کا راستہ ہموار کرتی ہیں، اور نیشنل پارٹی اسی اجتماعی قوت کو آگے بڑھاتے ہوئے آواران کو امن، ترقی، شفاف حکمرانی اور مضبوط سیاسی روایت کی طرف لے جائے گی۔
اجلاس میں کونسل کی منظور شدہ قراردادیں بھی پیش کی گئیں جن میں مطالبہ کیا گیا کہ آواران کے بند تعلیمی ادارے فوری طور پر کھولے جائیں، اسٹاف فراہم کیا جائے اور خاص طور پر بچیوں کی تعلیم و تربیت کے لیے خصوصی اقدامات کیے جائیں۔ اسی طرح ضلع بھر میں صحت کے مراکز قائم کرکے ڈاکٹر تعینات کرنے اور ضروری ادویات کی فراہمی یقینی بنانے کی ضرورت پر زور دیا گیا۔ اجلاس نے مواصلاتی نظام کی بہتری بالخصوص بیلہ تا آواران اور آواران ٹو تربت روڈ کے تعمیراتی کام کو تیز کرکے جلد مکمل کرنے کا بھی مطالبہ کیا۔
تقریب کے اختتام پر نو منتخب کابینہ کو مبارک باد دی گئی اور یہ امید ظاہر کی گئی کہ وہ عوامی مینڈیٹ کو مزید مضبوط بنا کر اسے درست سمت میں استعمال کرتے ہوئے علاقائی ترقی، عوامی خوشحالی، جمہوری شعور اور آئینی حقوق کے فروغ کے لیے اپنے کردار کو مؤثر انداز میں ادا کریں گے اور قیادت و کارکنان اپنے عمل سے عوام کے سامنے سرخرو ہوں گے۔