لاہور(این این آئی)وزیراعظم شہباز شریف سے وفاقی وزیر داخلہ محسن نقوی نے یہاں ملاقات کی۔ملاقات کے دوران وزیر داخلہ نے وزیراعظم کو یوم عاشور کے موقع پر ملک بھر میں کیے گئے سکیورٹی انتظامات پر تفصیلی بریفنگ دی۔وزیر داخلہ نے بتایا کہ یوم عاشور کے دوران ملک بھر میں عزاداری کے جلوسوں، مجالس اور دیگر تقریبات کو پر امن طریقے سے یقینی بنانے کیلئے موثر سکیورٹی حکمت عملی اپنائی اور عوام کو سہولیات کی فراہمی کیلئے تمام تر اقدامات کیے۔ اس موقع پر وزیراعظم نے وفاقی وزیرداخلہ محسن نقوی کو عاشورہ کے انتظامات احسن طریقے سے کرنے پر سراہا۔وزیراعظم نے صوبائی انتظامیہ، پولیس، رینجرز اوردیگر قانون نافذ کرنے والے اداروں کی خدمات کو بھی سراہا اور کہا کہ موثر اور پیشہ وارانہ منصوبہ بندی کی بدولت یوم عاشور کا پرامن انعقاد ممکن ہوا۔شہباز شریف نے چاروں صوبوں کے وزرائے اعلیٰ، وزیراعظم آزاد کشمیر اور وزیراعلیٰ گلگت بلتستان کو بھی موثر اور پرامن سکیورٹی انتظامات پر خراج تحسین پیش کیا۔
وزیراعظم سے محسن نقوی کی ملاقات،یوم عاشور پر ملک بھر میں کیے گئے سکیورٹی انتظامات پر بریفنگ
