قومی اسمبلی قائمہ کمیٹی عا بینکاری نظام، خاص طور پر کمرشل بینکوں کی جانب سے مستحق افراد کے بینک اکاؤنٹس کھولنے میں ہچکچاہٹ پر تحفظات کا اظہار

اسلام آباد (این این آئی)قومی اسمبلی کی غربت کے خاتمے اور سماجی تحفظ کی قائمہ کمیٹی نے بینکاری نظام، خاص طور پر کمرشل بینکوں کی جانب سے مستحق افراد کے بینک اکاؤنٹس کھولنے میں ہچکچاہٹ پر شدید تحفظات کا اظہار کرتے ہوئے کہا ہے کہ ملک کے پسماندہ علاقوں میں ان دونوں نظاموں سے متعلق مؤثر آگاہی اور خصوصی تربیتی پروگراموں کا انعقاد ضروری ہے۔قومی اسمبلی کی غربت کے خاتمے اور سماجی تحفظ کی قائمہ کمیٹی کا گیارھواں اجلاس جمعہ کی صبحپارلیمنٹ ہاؤس اسلام آباد میں منعقد ہوا۔ اجلاس کی صدارت کمیٹی کے چیئرمین میر غلام علی تالپور نے کی۔اجلاس میں پاکستان کے فلاحی نظام کے اہم پہلوؤں کا جائزہ لیا گیا، خاص طور پر بینظیر انکم سپورٹ پروگرام (BISP) کے نفاذ میں درپیش رکاوٹوں پر تفصیلی تبادلہ خیال کیا گیا۔ کمیٹی نے بینکاری نظام، خاص طور پر کمرشل بینکوں کی جانب سے مستحق افراد کے بینک اکاؤنٹس کھولنے میں ہچکچاہٹ پر شدید تحفظات کا اظہار کیا اور کمزور طبقات کے لیے فوری اصلاحات پر زور دیا۔ابتدائی ایجنڈے کے طور پر، وزارت نے سابقہ اجلاس میں دی گئی ہدایات پر عملدرآمد سے متعلق رپورٹ پیش کی۔ تاہم، اسٹیٹ بینک آف پاکستان کی طرف سے فراہم کردہ جوابات کو ناکافی قرار دیتے ہوئے اراکین نے وزارت سے مطالبہ کیا کہ وہ اس معاملے کو فوری طور پر اعلیٰ سطح پر اٹھائے۔اجلاس میں بی آئی ایس پی کے مستفیدین کی مالی شمولیت میں حائل رکاوٹوں پر مفصل گفتگو ہوئی۔ اراکین نے اس امر پر تشویش کا اظہار کیا کہ نجی مالیاتی ادارے (PFIs) اب بھی روایتی صارفین کو ترجیح دے رہے ہیں اور مستحق افراد کے اکاؤنٹس کھولنے سے گریزاں ہیں۔ اس کے جواب میں، سیکرٹری BISP نے اس مسلے حل کی تفصیلات بیان کیں جن میں جسمانی طور پر بی آئی ایس پی سہولت پر مبنی اکاؤنٹس، اور دوسرا، سی آئی این سی سے منسلک موبائل سمز کے ذریعے بائیومیٹرک تصدیق والے ڈیجیٹل والٹس۔ جسمانی اکاؤنٹس کا پائلٹ پروجیکٹ 14 اگست کو کراچی میں شروع ہوگا، جو یوم آزادی کے موقع پر مالی شمولیت کی ایک علامت ہوگا۔ دونوں نظاموں کا ابتدائی دورانیہ چھ ماہ ہوگا، جس کے بعد جنوری 2026 میں ان کا جامع جائزہ لیا جائے گا۔کمیٹی نے اس بات پر زور دیا کہ ملک کے پسماندہ علاقوں میں ان دونوں نظاموں سے متعلق مؤثر آگاہی اور خصوصی تربیتی پروگراموں کا انعقاد ضروری ہے تاکہ عوام کو ان سہولیات سے بھرپور فائدہ حاصل ہو سکے۔اجلاس میں کراچی میں حالیہ عمارت گرنے کے واقعے کے تناظر میں بے گھر ہونے والی خواتین کے لیے بی آئی ایس پی کے کردار پر بھی سوالات اٹھائے گئے۔ وزارت غربت کے خاتمے اور بی آئی ایس پی کے سیکرٹری نے واضح کیا کہ رہائش اور پناہ گاہوں کا معاملہ آئینی طور پر صوبائی دائرہ اختیار میں آتا ہے۔اجلاس کے دوران بی آئی ایس پی کی میڈیا مہمات اور تشہیر پر آنے والے اخراجات کی شفافیت پر بھی سوالات اٹھے۔ اراکین نے مالی سال 2024-25 اور 2025-26 کے مکمل اخراجات کی تفصیلات طلب کیں، کیونکہ پیش کردہ ابتدائی رپورٹس ناکافی پائی گئیں۔عملی چیلنجز، جیسے کہ ادائیگیوں میں تاخیر، کو روکنے کیلئے کیمپ سائٹس پر دوہری تصدیق کے نظام کی بہتری پر بھی گفتگو ہوئی۔ اجلاس میں بتایا گیا کہ معاہدے کی خلاف ورزی پر حبیب بینک لمیٹڈ کے ساتھ معاہدہ ختم کر دیا گیا ہے، جبکہ دیگر ناکارہ بینکوں کے خلاف بھی سخت اقدامات زیر غور ہیں۔کمیٹی نے وزارت منصوبہ بندی کی جانب سے 2019 میں جاری کردہ کثیر جہتی غربت انڈیکس (MPI) ڈیٹا کو فرسودہ قرار دیتے ہوئے اگلے اجلاس میں تازہ اور تقابلی ڈیٹا پیش کرنے کی ہدایت کی۔کمیٹی نے وزارت غربت کو فوری طور پر وزارت خزانہ سے رابطہ کرکے بی آئی ایس پی میں درپیش افرادی قوت کی کمی کا حل نکالنے اور بھرتیوں پر عائد پابندی ختم کرانے کی ہدایت کی، تاکہ فلاحی اقدامات میں تسلسل قائم رکھا جا سکے۔ اجلاس میں یہ بھی بتایا گیا کہ قومی سطح پر غربت کے خاتمے کی پالیسی کا مسودہ تیار ہے، جو اس وقت صوبائی حکومتوں سے مشاورت کے مرحلے میں ہے۔ منظوری کے بعد ایک وفاقی و صوبائی کوآرڈینیشن کونسل تشکیل دی جائے گی۔اجلاس کے دوران پی پی اے ایف کی جانب سے 253 یونین کونسلوں میں 11.7 ارب روپے مالیت کے غیر ملکی امداد سے جاری منصوبوں کی تفصیلات بھی پیش کی گئیں، جن میں لائیو اسٹاک، مائیکرو ہائیڈل، اور غذائی پروگرام شامل ہیں۔ اس کے علاوہ نیشنل پاورٹی گریجویشن پروگرام کے دائرہ کار میں پانچ نئے اضلاع کی شمولیت اور نئے ڈونرز کی آمد کی بھی نشاندہی کی گئی، اگرچہ اس پروگرام کو تاحال پی ایس ڈی پی سے فنڈنگ فراہم نہیں کی گئی۔یہ اجلاس کمیٹی کے سماجی تحفظ کے نظام کی مضبوط نگرانی، شفافیت اور ادارہ جاتی اصلاحات کے عزم کا مظہر رہا۔اجلاس میں شریک معزز اراکینِ قومی اسمبلی میر غلام علی تالپور، محترمہ آسیہ اسحاق صدیقی، محترمہ مہتاب اکبر راشدی، محترم ارشد عبداللہ وہرہ، محمد بشیر خان، مصباح الدین، محمد الیاس چوہدری، میر خان محمد جمالی، جبکہ محترمہ انیقہ مہدی اور شاہد عثمان نے اجلاس میں آن لائن شرکت کی۔اجلاس میں وزارت غربت کے خاتمہ و سماجی تحفظ، وزارت منصوبہ بندی، ترقی و خصوصی اقدامات کے اعلیٰ حکام اور ان کے ماتحت اداروں بی آئی ایس پی،پی پی اے ایف اور ٹی وی او کے نمائندگان بھی شریک ہوئے۔