محکمہ تعلیم میں حالیہ بھرتیوں کے حوالے سے امیدواروں کے کاغذات کی جانچ پڑتال کے دوران 14امیدواروں کے کاغذات جعلی ثابت ہوئے،ڈپٹی کمشنر جعفرآباد خالد خان

جعفرآباد(این این آئی) ڈپٹی کمشنر جعفر آباد خالد خان کی زیر صدارت ڈسٹرکٹ ریکروٹمنٹ کمیٹی کا اہم اجلاس منعقد ہوا جس میں محکمہ تعلیم میں حالیہ بھرتیوں کے حوالے سے امیدواروں کے کاغذات کی باریک بینی سے جانچ پڑتال کی گئی۔ اجلاس کے دوران دو امیدواروں کے کاغذات کو درست قرار دے کر ڈپٹی کمشنر خالد خان نے انہیں ان کی جائے تعیناتی کے آرڈرز جاری کر دیے۔ اجلاس میں کمیٹی ممبران نے درجنوں امیدواروں کے تعلیمی و پیشہ ورانہ اسناد کی تفصیل سے چھان بین کی، جس کے نتیجے میں 14 امیدواروں کے کاغذات جعلی ثابت ہوئے۔ بوگس اور غیر تصدیق شدہ سرٹیفکیٹس رکھنے والے افراد کے آرڈرز فوری طور پر منسوخ کر کے انہیں ٹرمینیٹ کر دیا گیا۔اس موقع پر ایڈیشنل ڈپٹی کمشنر خلیل احمد بھی موجود تھے ڈپٹی کمشنر خالد خان نے واضح کیا کہ جعلی اسناد رکھنے والوں کے لیے محکمہ تعلیم میں کوئی جگہ نہیں، حقدار اور باصلاحیت امیدواروں کو ہی مکمل میرٹ اور شفافیت کی بنیاد پر موقع فراہم کیا جائے گا۔ انہوں نے کہا کہ ویریفکیشن کا عمل مکمل ہونے تک کسی بھی امیدوار کو مستقل طور پر تعینات نہیں کیا جائے گا اور ہر سطح پر جعل سازی کی روک تھام کو یقینی بنایا جائے گا۔ ڈپٹی کمشنر کا کہنا تھا کہ محکمہ تعلیم میں بہتری کے لیے نئے تعینات ہونے والے اساتذہ کی خدمات نہایت اہمیت کی حامل ہیں تاکہ علاقے میں تعلیمی معیار کو بلند کر کے ترقی، خوشحالی اور علم کی روشنی کو عام کیا جا سکے۔ انہوں نے واضح پیغام دیا کہ محکمہ تعلیم کو جعلی عناصر سے پاک کر کے اہل اور باصلاحیت افراد کو آگے لایا جائے گا تاکہ نسلِ نو کا مستقبل محفوظ بنایا جا سکے۔